لمحے جو خاص ہوتے ہیں

دو اکیلے دل جب ملتے ہیں

دھڑکتے ہیں، بھڑکتے ہیں

کبھی ہچکچاتے ہیں

کبھی گڑگڑاتے ہیں

پہلی نظر کی چاہت جب

الفت حدوں کو پار کرتی ہے

محبت کا روپ دھارے جب

ہر لمحے اقرار کرتی ہے

وہ لمحہ خاص ہوتا ہے

بہت ہی خاص ہوتا ہے

#urdu #poem #poetry #lamhe #moments #love #nostalgia #memories 

لمحہ جو خاص ہوتا ہے

اور جب وہ مانگا جاتا ہے

کبھی نا بجھنے والی

صحرا کی پیاس ہوتا ہے

ایک سلگتی اور دہکتی

انگارہ بنتی آس ہوتا ہے

 

لمحہ جو خاص ہوتا ہے

اور جب وہ بخشا جاتا ہے

روح کی سب سے بیش قیمت

بیش بہا اساس ہوتا ہے

گزری تکلیفوں اور دکھوں کا

اپنے آپ میں قصاص ہوتا ہے

 

مگر لمحہ جو خاص ہوتا ہے

جب ماضی بنتا ہے اور یاد آتا ہے

گلے میں چبھتا پھنستا

اک لامحدود یاس ہوتا ہے

خواہش کی روتی بیوہ کا

ماتمی لباس ہوتا ہے

 

لمحہ جو آس ہوتا ہے

کل اس پر مبیّن ہے

لمحہ جو خاص ہوتا ہے

آج اس سے مزیّن ہے

لمحہ جو یاس ہوتا ہے

کل اس پر متعیّن ہے

 

تو وہ ایسے کتنے لمحے تھے

جو تم نے مانگے

گڑگڑا کر اپنے سجدوں میں؟

تو وہ ایسے کتنے لمحے تھے

جو اس نے بخشے

مسکرا کر اپنے ہاتھوں سے؟

تو وہ ایسے کتنے لمحے تھے

جو تم نے سینچے

اپنے خوابوں سے؟

اور وہ ایسے کتنے لمحے تھے

تمھارے ماضی میں

جو تمھیں آواز دیتے ہیں؟

تخیّل کی تھکن کو

پھر سے خواہش پرواز دیتے ہیں؟

 

وہ جتنے لمحے تھے

اب ان سب کو ہتھیلی پر سجا کر

تیز ہواؤں کے سپرد کر دو

آزاد کر دو اپنے چنگل سے

وہ جتنے لمحے تھے

ان سب کو چن کر

خشک پتوں میں جلا کر راکھ کر دو

بھسم کر دو رگڑ دو لوح ایام سے

وہ جتنے لمحے تھے

زندگی کی آخری شام الوداہ کہ کر

ان کو بھول جاؤ، دریا برد کر دو

الگ کر دو اپنے ماضی سے